أزمة متعدد الشغف المثالي

كتبت/ منة الخياط

بنشوف شباب كتير بيحب حاجات كتير جدا و مختلفة عن بعض و المشكلة انه بيكون مثالي فيها كلها تقريبا .

السؤال هنا فين المشكلة بالعكس دي مميزات!؟
في الحقيقة ان في بعض الأشخاص بيوصل معاهم الوضع انه يتحول الي أزمة حقيقية و هي (أزمة متعدد الشغف) و الازمة دي الشخص بيكون عنده حب اكتشاف لكل حاجة جديدة و غريبة عليه و بيكتشف انه لما بيدخل في اي حاجة بيكون مثالي فيها و مع كل حاجة جديدة بيدخلها الوضع معاه بيكون أصعب لانه عارفه انه ممكن يكون أفضل ف حاجة جديدة و مع الوقت للأسف يبدأ يقفد هويته!

(أزمة الهوية) : انا مين؟ بحب اي اكتر ؟ انا عايز أوصل لإيه؟
و مع كتر الأسئلة و ضغط المجتمع بسبب كتر رغباته المتغيرة و صعوبة استمراره ف وظيفة ثابتة و يبدأ الشعور بالذنب و جلد الذات و محاولة انسحاب و هروب مستمر..

🧠كميا دماغ متعدد الشغف : الحقيقة دماغه مع كل بداية حاجة جديدة بيبدأ يفرز هرمون الدوبامين! حماس البداية و متعة التعلم و بعد مده صغيره من الممارسة و الإتقان بيحصل ملل و الدماغ عايز ياخد الدوبامين تاني! ف يبدأ يدور علي حاجه جديدة يتعرف عليها و يفضل ف نفس الوضع..

(أنت مميز ):
بيكون قادر علي ربط المهارات و المجالات المختلفة حتي لو كانت معرفته فيها قليلة!
بسبب قوة الاتصال بين فصين المخ : (الأيمن): مرتبط بالابداع و الخيال (الايسر): مرتبط بالمنطق و التحليل دا بيخلق عنده الإبداع العالي و المرونة و سرعة التعلم.

(َالحل دائما) :
في حب الذات ازاي تخلق لنفسك بيزنس او تشتغل شغل يجمع اكتر من مجال!؟
.يعني لو بتحب الرسم و علم النفس و الكتابة ممكن تعمل كتاب بيتكلم عن علم النفس و ترسم كل مشكلة و علاقاتها بالألوان و أفكار كتير..
حدد أولوياتك ف اختيار الهدف بتاعك الحالي و لما يظهر هدف جديد اكتبه و حدد له ميعاد بعد فترة…
دايما أفصل شغفك عن هواياتك
يكون عندك أرض صلبة : وظيفة او مصدر ربح ثابت و أكتشف هواياتك الكتير و حبها كلها و متقلقش من البداية.
معظم رجال النهضة زمان كانوا يتميزوا بتعدد الشغف و أكتشاف اكتر من مجال و منهم (ابن سينا) و (ابن خلدون) و غيرهم كتير…
خلق التوازن و تنظيم للوقت و محاولة دمج كل شيئ جديد بالقديم لابتكار شيئ من الا شيئ..

تذكر دائما ان تقبل الذات الحقيقي لما نفهم ان عيوبنا ما هي الا مميزات و علينا استغلالها .