في مدن بنزورها وفي مدن بتخطفك

كتبت / نورين إسلام صلاح

لما تكون مخنوق إسكندرية الحل لإنها المكان اللي بحس فيه بالامان والراحة النفسية البحر مختلف وبمشي فيها من غير خطه لإن كل تفاصيلها مميزة إسكندرية بتخطفك بسحرها حتي لو أنت مش من أهلها لإن

في أماكن بنروحها بنقضي فيها وقت ونمشي وفي أماكن لما نروحها بتحس إنها قريبة من قلبك وبنحس فيها بالهدوء والراحة النفسية لمجرد وجودنا فيها إسكندرية من الأماكن اللي بتريحني نفسياً لما أكون تعبانة أو زعلانه ومش قادرة أتكلم مع حد لما أوصل إسكندرية وأشوف البحر بحس بسلام نفسي وراحة وكأن إسكندرية فيها سحر خاص ولها طريقة تخليك تنسى همومك كأن البحر في إسكندرية بيتحول لدكتور نفسي بفضفض معاه وأكلمه ومجرد لما بشوفه بحس براحه ونفسي تتفتح للدنيا تاني وأجيب آيس كريم أو أكل حاجة وأحيانًا أكون لوحدي ومع ذلك بكون سعيدة يمكن لإني بحس إن إسكندرية بيتي بتحرك فيها بسهولة ومن غير خطة وكل مره بكتشف فيها تفصيلة جديدة تخليني أحبها أكتر وتجربة الأكل في إسكندرية ممتعه جداً لإنك مش محتاج تفكر هتاكل أيه ولا فين لإن كل اكله تقريباً لها أكتر من إختيار ومكان زي السمك مثلاً وهو الأكلة الأشهر في الإسكندرية وكمان متعة أكل الأيس كريم وانت بتتمشي علي الكورنيش متتوصفش بالكلام لازم تجربها وتعيشها المتعه مش في طعم الأكل نفسه المتعه الحقيقية في بحر إسكندرية وأنت بتتفرج عليه وتشم ريحته وأنت بتاكل ومن الأماكن الساحرة في إسكندرية ولها طابع خاص المكس لإنها بتجمع بين سحر البحر و طعم الأكل وروح إسكندرية. ويمكن ده السبب ان الأكل في إسكندرية بيكون مختلف لانه مرتبط بسحر وجمال المكان نفسه بالشوارع والناس والمباني والجو الساحر اللي بيحول إسكندرية من مدينة عادية للوحة فنية محدش يعرف سرها ولا حتي أهلها

إسكندرية مختلفة لأسباب كتير منها الطراز الفريد للمباني القديمة الجميلة اللي بتشوفها بقلبك قبل عقلك ورغم إن المبني بيكون قديم لكن بيخطفك ويكون نفسك تفضل واقف تتفرج عليه وتاخد صورة معاه وكمان الأماكن الأثرية بتجذب أهل وزوار إسكندرية وبيحبوا يعيشوا التجربة بزيارتها والتصوير فيها ومن أشهر الأماكن الأثرية قلعة قايتباي وبسبب موقعها المتميز على البحر بتكون تجربة زيارتها مختلفة لإنك بتستمع بالمكان وأنت شايف البحر من كل مكان حواليك ومن التفاصيل القديمة الجذابه في إسكندرية حتي الآن الترام لإنه بيميز إسكندرية بشكل وروح خاصة ممكن تشوفها بسيطة لكنها جزء من الصورة الساحرة واللوحة الفنية لإسكندرية وفي النهاية سر جمال إسكندرية مش البحر لوحده ولا الأكل، ولا شوارعها ولا الترام ولا مبانيها القديمة ولا التصوير في الأماكن الأثرية لكن جمال إسكندرية الحقيقي في كل التفاصيل مجتمعة إسكندرية مدينة لها سحر خاص فيها روح فيها شعب جميل وفيها تفاصيل بسيطة ممكن تخلي أي يوم عادي يبقى أحلى يوم بحياتك مدينة تقدر تروحها وإنت زعلان ومخنوق وتتمشى فيها وتشوف البحر وتاكل الأكل اللي بتحبه وفجأة ترجع سعيد وناسي همومك لإن إسكندرية من المدن اللي بتخطف قلبك وروحك وعقلك وبتحسسك إنك واحد منها ولك فيها ذكريات حتي لو أنت مش من أهلها إسكندرية مش مدينة بتزورها إسكندرية مدينة بتخطفك ٠