زلزال الطلاق وتوابعه
بقلم / منه أسامه الأسرة هي أول مكان الطفل بيتعلم فيه معنى الأمان والحب والاستقرار وعشان كده لما يحصل تفكك داخل الأسرة سواء بسبب الطلاق أو كثرة المشاكل والخلافات بين الأب والأم الطفل بيكون أكتر شخص بيتأثر باللي بيحصل حواليه حتى لو الأب والأم مش حاسين بده
في أسباب كتير ممكن تؤدي لتفكك الأسرة من أهمها كثرة الخلافات بين الزوجين وعدم وجود تفاهم بينهم والمشاكل المادية والضغوط النفسية وكمان تدخل الأهل في حياة الزوجين وفي بعض الحالات بيكون الطلاق هو الحل الأخير بعد ما تفشل كل محاولات الإصلاح
تأثير التفكك على الطفل
الطفل ممكن يحس بالخوف والقلق وعدم الأمان خصوصًا لو كان شايف الخلافات والمشاكل بشكل مستمر وممكن كمان يتغير سلوكه فيبقى عصبي أو منطوي أو مستواه الدراسي يقل وممكن يحس إنه السبب في المشاكل اللي حصلت بين والده ووالدته
وأحيانًا الطفل بيحس إنه لازم يختار بين الأب والأم وده بيحطه تحت ضغط نفسي كبير عشان كده مهم جدًا إن الأب والأم حتى لو حصل انفصال بينهم يبعدوا الطفل عن الخلافات وما يستخدموهوش كوسيلة للضغط على الطرف التاني
حل المشكلة مش معناه إن كل الأسر لازم تفضل مع بعض مهما كانت الظروف لكن المهم إن مصلحة الطفل تكون الأولوية ولو المشاكل بين الأب والأم ممكن تتحل لازم يحاولوا يتكلموا بهدوء ويفهموا بعض وممكن يلجأوا لشخص متخصص في الإرشاد الأسري يساعدهم
ولو حصل الطلاق بالفعل لازم الأب والأم يتفقوا على طريقة تربية الطفل ويحافظوا على علاقتهم بيه ويأكدوا له إن الانفصال مش ذنبه وإنهم لسه بيحبوه وبيحافظوا عليه
كمان المدرسة والمجتمع ليهم دور مهم في دعم الأطفال اللي بيمروا بظروف أسرية صعبة عن طريق الاستماع ليهم ومساعدتهم بدل ما يتم الحكم عليهم أو لومهم
وأولًا وأخيرًا تفكك الأسرة مش بس مشكلة بين أب وأم لكنه ممكن يأثر بشكل كبير على حياة الأطفال ومستقبلهم وعشان كده لازم كل قرار يتاخد يكون فيه تفكير في مصلحة الطفل أولًا لأن الطفل محتاج يحس إنه محبوب وآمن حتى لو شكل الأسرة اتغير
حافظوا على أطفالكم وحبوهم وافتكروا دايمًا إن الطفل ملوش ذنب في خلافات الكبار وإن أبسط حق من حقوقه إنه يعيش في أمان ويحس بالحب والاهتمام مهما كانت الظروف .