*البيت اللي بيوجع.. لما الأمان يبقى خوف*
كتبت :بسمله مصطفي عبد الرؤوف
*البيت اللي بيوجع.. لما الأمان يبقى خوف*
كلنا لما الدنيا تقسى علينا بنجري نقول “عايز أروح بيتي”، كأن البيت هو العلاج.
طب لو البيت هو نفسه سبب التعب؟
المفروض البيت هو الأمان، الحضن اللي بيطمنا. بس في بيوت كتير، البيت هو اللي بيوجع، وصوت المفتاح في الباب بقى يخوف بدل ما يطمن.
هو ده العنف الأسري.
*العنف الأسري مش ضرب بس..*
ناس كتير فاكرة إن العنف يعني ضرب وبيسيب علامة، بس الحقيقة إن في عنف أوجع من الضرب بكتير ومش بيتشاف.
*1- عنف يوجع الروح بالكلام:*
لما الأب أو الأم طول الوقت يقولوا “انت فاشل، انت ملكش لازمة، انت عمرك ما هتنفع”. الكلمة دي مش بتتنسي، بتفضل جوه الطفل تكبر معاه وتخليه يشوف نفسه قليل حتى لو بقى ناجح.
*2- عنف الصمت والتفرقة:*
لما نفرق بين ولد وبنت، أو بين طفل شاطر وطفل تاني، لما نحب واحد أكتر من التاني قدامهم. ده بيزرع غيرة وكره بين الأخوات وبيكسر قلب الصغير.
*3- عنف السيطرة والفلوس:*
لما الأهل يفتشوا موبايلات ولادهم، يمنعوهم من صحابهم، يختاروا لهم كل حاجة في حياتهم باسم “احنا خايفين عليكم”. الخوف الزيادة ده بيخنق وبيخلي الابن يكذب عشان يعيش، ويبعد عن أهله وهو ساكن معاهم. ونفس الشيء لما الزوج يذل مراته بالفلوس ويتحكم فيها.
*4- عنف يوجع الجسم:*
الضرب والزق والقرص. اللي بيسيب علامة في الجسم، بس الأهم بيسيب علامة في النفسية عمرها ما بتروح، وبيخلي الطفل يخاف لما أي حد يرفع إيده قدامه حتى لو بيهزر.
*ليه بيحصل؟*
بيحصل عشان اتربينا على جملة “ما احنا ياما اتضربنا وطلعنا زي الفل”. لأ، مطلعناش زي الفل. فينا اللي طلع بيخاف، اللي طلع مش واثق في نفسه، واللي طلع بيضرب ولاده زي ما اتضرب.
وبيحصل عشان ساكتين. الأم ساكتة عشان “العيال”، والبنت ساكتة عشان “ما ينفعش أتكلم”، والولد ساكت عشان “عيب الراجل يعيط”. السكوت ده هو اللي بيخلي العنف يكمل.
*العنف بيسيب إيه ورانا؟*
بيسيب بني آدم خايف، بيعتذر طول الوقت حتى لو مش غلطان، بيترعب من أي صوت عالي، ومش عارف يحب لأنه اتعلم إن اللي بيحبك هو أكتر حد ممكن يوجعك.
أخطر حاجة في العنف الأسري إنه دايرة بتلف. اللي بيتوجع جوه بيته النهاردة، يا إما هيطلع يوجع الناس بره، يا إما هيفضل ساكت وبيتوجع لوحده، وبكره هيوجع ولاده بنفس الطريقة وهو فاكر إنها تربية.
*طب الحل؟*
الحل مش إننا نقول “استحملوا”.
الحل إن البيت يرجع أمان تاني.
البيت القوي مش اللي مفيهوش مشاكل، ولا اللي صوته عالي. البيت القوي اللي فيه احترام، اللي فيه الأب يسمع، والأم تطبطب، والولاد يعرفوا يحكوا من غير خوف.
نبطل نقول “عيب تتكلم” ونقول “احكي أنا سامعك”.
نبطل نقول “انت غبي” ونقول “حاول تاني”.
نبطل نربي بالخوف، ونبدأ نربي بالحب.
لو صلحنا البيت، الشارع كله هيتصلح.